نصائح تشطيب الشقه

 

إزاى أشطب شقتى .. نصائح بسيطة ( مش شرط تبقى مهندس عشان تشطب صح )

بقلم : م / محمد فرح

 

الكثير يجتهد من أجل ظهور شقته بالمظهر المثالى قبل زواجهأو عند تجديده للشقة وفى هذه المقالة نحاول توضيح بعض النقاط السريعة لتعم الاستفادة للجميع.

 

1.     حاول تخطط لكل تفصيله قبل ماتبدأ شغل.

2.     ارسم فرش افتراضي للشقة عشان تقدر تحدد أماكن مخارج الكهرباء والسباكة صح.

3.     المطبخ من أهم الفراغات في الشقة بلاش تضيق مساحته عشان توسع الريسبشن.

4.     حاول توسع المطبخ على قد ماتقدر.

5.     اعمل حسابك تجيب ترابيزة أكل صغيرة في المطبخ دي أهم من ترابيزة السفرة.

6.     اهتم بالليفينج أكتر من الريسيبشن.

7.     مش لازم تجيب بوفيه و نيش ,الجزامة أهم.

8.     الدييب فريزر و المايكروويف أساسيات أكتر من الصيني اللي ماحدش بيستخدمه.

9.     لو شقتك ضيقه ماتعملش حمام ضيوف عشان الضيوف اللي مش بييجوا غير مرة في السنة.

10. لو ما اخترتش البورسلين صح و ركبته صح هيفك من الأرض بعد سنتين.

11. لو حابب تدلع شقتك ركب hdf في الغرف.. هتنبسط.وبلاش طبعاَ يتركب فى الحمام.

12. لو مش حابب تدلع شقتك على الأقل ركب hdf في غرفة النوم.. صدقني هتنبسط.

13. لو شقتك مجروحة من الجيران ماتنساش الستاير البلاك أوت.

14. البراقع و البلتكنات اللي هتختارها ديه موضة قدمت جداً من 15 سنة.

15. الدهانات الفاقعة  مش أحلى حاجة في الدنيا ولكن كله يرجع لذوقك.

16. ورق الحائط الـ 3d هايل بس ماتكترش منه.

17. أكتر 3 حاجات عاوزك تهتم بيها هي تأسيس السباكة و تأسيس الكهرباء و العزل.

18. الشبابيك الألومينيوم عملية أكتر من الشبابيك الخشب.

19. لو هتركب شبابيك ألومينيوم إختار أي قطاع PVC .

20. غرفة النوم الرئيسية ركب للشباك بتاعها زجاج دبل.

21. الشبابيك الجرار بتساعد على سهولة الفرش و لكن بتقلل الإضاءة و التهوية.

22. الشبابيك المفصلية بتزود الإضاءة و التهوية بس هتصعب عليك الفرش.

23. لو شقتك واسعة اعمل شبابيك مفصلي و لو ضيقة اعمل الشبابيك جرار.

24. لو شقتك في منطقة مش مأهولة بالسكان ركب كاميرات خارجية مابتتكلفش كتير على فكرة.

25. معابر الأبواب مهمة عشان بتمنع الصوت و الضوء و الحشرات.

26. إختار أبواب خشب كويسة عشان ماتندمش و باب الشقة هاته باب مصفح.

27. خلي النجار يركبلك جوانات كاوتش لكل الأبواب عشان بتمنع التراب و الصوت.

28. كل الشبابيك احقن حواليها فوم من الخارج و سليكون من الداخل عشان الحرارة و الصوت و التراب.

29. الجيبسوم بورد حاجة أساسية بس تستخدمه صح لما تحتاجه.

30. أكتر حاجة هتخلي شقتك شيك هي توزيع الإضاءة صح.. خلي حد مخصص يوزعلك الإضاءة.

31. اهتم إنك تشتري شفاط محترم للمطبخ.

32. اعمل حساب كل تفصيله في تأسيس الكهرباء و ماتنساش الدش و التليفزيون و التليفون و النت.

33. اعمل حسابك لتأسيس التكييف حتى لو مش هتشتري تكيييف.

34. بلاش دهانات مط و بلاش دهانات لامع.. النص لمعة أو الربع لمعة أشيك بكتير.

35. اختار كل حاجة قبل ماتبدأ تنفيذ أي حاجة.. دي قاعدة أساسية.

36. أسس اسكيب و شطب جوتن.. ده في الدهانات.

37. مافيش أشيك ولا أرقى من الدهانات السادة بس تختار الألوان صح.

38. بلاش تعمل تفاصيل كتير في الحوائط و الأرضيات و الديكورات عشان تعرف تفرش حضرتك.

39. لو الأبواب الخشب شكلها حلو ادهنها أستر و لو شكلها مش حلو ادهنها لاكية مغسول.

40. القاعدة الذهبية في إختيار أكر و كوالين الأبواب " الغالي رخيص"

41. القاعدة اللي فاتت دي برضه تنطبق على الخلاطات و الإكسسوار و النواكل.

42. الزجاج العاكس للشبابيك بيحجب 50% من الإضاءة.

43. الزجاج العاكس للشبابيك بيعكس الصبح بس مابيعكسش بالليل.

44. ألوان السجاد- ألوان الستاير- ألوان الفرش- ألوان الأبواب و الشبابيك- ألوان الموبيليا- ألوان دهانات الحوائط و الأسقف- ألوان الإكسسورات و الأنتيكات و التحف و الصور و البراويز... كل الحاجات دي ليها علاقة ببعض ولازم تنسقها صح عشان شقتك ماتبقاش ملعلطة.

45. حاول على قد ماتقدر تشتري كل لمبات الشقة لمبات ليد.. هتدفع مبلغ كبير بس هتوفره في فواتير الكهرباء.

46. لو هتجيب سخان كهرباء هات سعته كبيرة.

47. لو هتجيب سخان غاز اختار ماركة محترمة

48. في تأسيس الكهرباء ماتشتغلش غير بسلك السويدي الأصلي.

49. في تأسيس السباكة مواسير التغذية أكواثيرم أو باننجر و مواسير الصرف الشريف.

50. رخامة المطبخ هاتها جرانيت مش رخام.

51. الأحواض و القاعدة المعلقة بيدوا وسع للحمام و أسهل في النضافة.

52. إشتري الخلاطات و الصيني و النواكل للحمام و المطبخ قبل ما السباك يأسس.

53. لو بياض المحارة وحش و فيه مطبات أو شرخ حاول تعالجه قبل الدهانات.

54. لو بياض المحارة لسه فيه عيوب مش عارف تعالجها إستخدم معجون أسمنتي قبل الدهانات.

55. و انت بتقسم شقتك و بتفرشها إهتم براحتك و سعادتك أكتر من إهتمامك بالضيوف لأنك إنت اللي هتعيش في الشقة طول العمر مش الضيوف.

56. لو مش هتركب باب مصفح لباب الشقة يبقى يفضل تعمل باب حديد حماية.

57. ماتنساش تركب سلك لكل الشبابيك عشان الحشرات.

58. السلك الفايبر بيتقطع و السلك الصلب بيصدي.. هات سلك صلب و ادهنه عشان مايصديش.

59. لو عندك غرفة أطفال.. ادهنها لون يمشي أولادي أو بناتي.

60. إهتم جداً بسقية السيراميك و يفضل تشتري مادة سقية جاهزة و إوعى تلون أسمنت السقية بأكسيد.

61. قفل حوالين البانيو و الحوض و القاعدة و عند جميع زوايا و أركان الحمام و المطبخ بمادة حقن فواصل من شركة سيكا.. صدقني هتعيش مبسوط بعدها.

62. بلاش تخلي سخان واحد يغذي الحمام و المطبخ مع بعض عشان كل ماتدخل تاخد دش مراتك هتفتح حنفية المطبخ و هتتلسوع.

63. البيبة في المطبخ حلوة عشان التنضيف و وحشة عشان الحشرات و الروائح و السدد.

64. الكرانيش الجاهزة (فيوتك) أفضل 100 مرة من الجبس البلدي.

65. إختار أماكن و مناسيب برايز الكهرباء بعناية عشان دي من أكتر الحاجات اللي هتضايقك لو ما اخترتهاش صح.

66. بالنسبة للموبيليا حاول تخلي كل الأدراج القريبة من الأرض ليها مفاتيح عشان الأطفال بيعشقوا الأدراج.

67. الغسالة في الحمام ولا في المطبخ.. في المطبخ ولا في الحمام.. مش فارقة.

68. خلي خطيبتك أو مراتك هي اللي تختار الألوان عشان فعلاً هما بيشوفوا ألوان الرجاله مابتشوفهاش.

69. . ركب فلتر في المطبخ عشان مية الشرب في مصر غير صالحة للشرب.

70. . لو الشقة اللي تحتك متشطبة أو ساكنة نبه على العمال اللي في شقتك مايخمروش مونه على الأرض عشان هتنشع على الشقة اللي تحت و جارك هيطلع يتخانق معاك.

71. . لو الشقة اللي فوقك لسه ما اتشطبتش ابقى اتأكد إنه هيعزل الحمام و المطبخ و يختبر السباكة كويس.

72. . إعزل الحمام و المطبخ عزل أسمنتي أسهل و أفضل و أرخص.

73. بلاش تمعجن الحوائط كلها و بعدين تركب السيراميك عشان ده من أسباب ظهور رطوبة بأسفل الحوائط.

74. ماتساش تركب منشر في مكان بيوصله شمس عشان مهم.

75. لو شقتك راكب فيها أبواب وحشة و مش معاك فلوس تغيرها ركبلها وشوش MDF .

76. لو الحمام بتاعك ضيق ماتركبش بانيو.. قفل كابينة شاور بيلت إن عملية و هتديلك مساحة واسعة.

77. الشركات المنتجة لمواسير السباكة المحترمة ممكن تيجي تعملك إختبار ضغط للمواسير و تديلك ضمان مدى الحياة ضد التسريب و عيوب الصناعة.. دي حاجة مهمة.

78. اعمل حسابك إن تكلفة تشطيب الشقة هتعدي ضعف الرقم اللي انت كنت عامل حسابك عليه.. دي قاعدة لم و لن تتغير.

79. لو عاوز تحسب تكلفة تشطيب شقتك قبل ماتبدأ بشكل تقريبي إضرب صافي مساحة الشقة في 1500 ج أو 2000 ج أو 2500 دي هتطلعلك التكلفة بالتقريب حسب طبعاً إختياراتك و مستوى التشطيب اللي هتعمله.

80. . لو جبت مهندس شاطر و محترم و أمين يشطبلك الشقة هتشتري دماغك و توفر وقت و فلوس

_ ____________________ _ 

م محمد فرح 

مهندس بادارة العقود والاحتياجات - مجموعة طلعت مصطفى

01004843826